Мэдээ мэдээлэл - Chingeltei.nutag.mn

Нөмрөгийн дархан цаазат газар шатлаа, хариуцлагыг хэн хүлээх вэ?

zulaa — Fri, 23 Oct 2026 11:35:43 +0800

Дорнод аймгийн Халхгол сумын Нөмрөгийн дархан цаазат газрын 79.8 хувь буюу 468,965.7 га талбайг хамарсан түймрийг аравдугаар сарын 8-наас 16-ныг хүртэл найман хоног тэмцсэний эцэст унтраажээ. Бараг 470 мянган га газар шатсан нь зөвхөн өвс ургамлын хохирол бус, хөрс, ан амьтдын амьдрах орчин, байгалийн унаган төрхөд учирсан томоохон гарз юм. Харин экосистемийг нөхөн сэргээхэд хэдий хугацаа, ямар хэмжээний хөрөнгө шаардлагатай нь одоогоор тодорхойгүй байна.

Түймэр “Мобиком” корпорацийн удирдлагуудын зорчиж явсан “Ниссан Патрол” автомашинд гал гарснаас эхэлсэн гэх мэдээлэл бий. Тухайн үед гүйцэтгэх захирал Ясүхиро Очи, бизнес хариуцсан дэд захирал Б.Мөнхзориг болон бусад албан тушаалтан тус бүсэд зорчиж явжээ. Компани хилийн заставуудын харилцаа холбооны сүлжээний ажилтай холбоотойгоор зорчиж байсан бөгөөд хил хамгаалах байгууллагаас зөвшөөрөл авсан гэж тайлбарласан. Гэвч хилийн бүсэд нэвтрэх зөвшөөрөл нь дархан цаазат газрын хамгаалалтын дэглэмийг бүрэн хангасны баталгаа биш. Тэд ямар маршрутаар зорчсон, тусгай хамгаалалттай газар нутагт нэвтрэх зөвшөөрөлтэй байсан эсэх, галын аюулгүй байдлын шаардлагыг мөрдсөн эсэхийг тодруулах шаардлагатай.

Түймрийг унтраахад Монголын онцгой байдлын алба хаагчид, хилийн цэргийн бие бүрэлдэхүүн, орон нутгийн иргэд оролцож, БНХАУ-ын талаас 58 хүн, 14 техник хэрэгсэлтэйгээр дэмжлэг үзүүлжээ. Мөн УИХ-ын гишүүн У.Отгонбаяр аравдугаар сарын 6-нд “Мобиком”-ын удирдлагуудтай хамт Сүмбэрийн боомтын шилэн кабелийн нээлтэд оролцсон ч түймэр гарсан өдөр Улаанбаатарт байсан гэж тайлбарласан байна. Хил хамгаалах ерөнхий газар ч түүнийг түймэр гарах үед тухайн газарт байгаагүй гэж мэдээлжээ.

Аравдугаар сарын 15-нд “Мобиком”-ын гүйцэтгэх захирал Ясүхиро Очи уучлал хүсэж, шалгалтад хамтран ажиллан, хуульд заасан журмын дагуу хохирлыг барагдуулах арга хэмжээ авна гэдгээ мэдэгдсэн. Засгийн газар аравдугаар сарын 21-нд түймрийн шалтгаан, хохирлыг тогтоох, нөхөн сэргээх төлөвлөгөө боловсруулах, гэм буруутай этгээдээр хохирлыг нөхөн төлүүлэх чиглэл өгсөн талаар мэдээлжээ.

Холбогдох хууль тогтоомжийн дагуу буруутай этгээд тогтоогдвол байгаль орчинд учирсан хохирол болон хуульд заасан бусад зардлыг нөхөн төлүүлэх, зөрчилд хариуцлага тооцох асуудал яригдана. Гэвч мөнгөн нөхөн төлбөр нь шатсан экосистемийг шууд сэргээхгүй. Хөрс, ургамал, амьтдын амьдрах орчны хохирлыг шинжлэх ухааны үндэслэлтэй үнэлж, нөхөн сэргээлтийн хугацаа, төсөв, хэрэгжүүлэх ажлыг тодорхой болгох шаардлагатай.

470 мянган га газар шатсан байхад уучлал хүссэн мэдэгдлээр асуудал дуусах ёсгүй. Автомашин юунаас болж шатсан, хэн ямар зөвшөөрөл олгосон, хамгаалалтын хяналт хэрхэн хэрэгжсэн, байгальд учирсан хохирлыг хэн хариуцахыг олон нийтэд ил тод мэдээлэх учиртай. Нөмрөгийн дархан цаазат газрын байгалийн унаган төрхийг сэргээх нь урт хугацааны ажил. Тиймээс энэ хэргийн гол асуудал нь зөвхөн буруутныг тогтоох бус, сүйдсэн байгалийг бодитоор нөхөн сэргээх нь гол ажил юм.

П.Самдан
www.BOLOD.mn

"Өвөр Монголын соёлын өдрүүд"-г танилцуулах хэвлэлийн бага хурал боллоо

zulaa — Wed, 21 Oct 2026 18:37:31 +0800

Жил бүр уламжлал болгон зохион байгуулдаг Өвөр Монголын Соёлын Өдрүүд арга хэмжээ 9-р сарын 22-ноос 25-ны өдрүүдэд Улаанбаатар хотноо зохиогдох гэж байна. 14 дэх удаа болж буй энэхүү арга хэмжээний хэвлэлийн бага хурал өнөөдөр буюу 9-р сарын 17-ны өдөр Улаанбаатар хотноо болж, БНХАУ-аас Монгол Улсад суугаа ЭСЯ-ны Солилцоо, хамтын ажиллагааны зөвлөх бөгөөд Улаанбаатар хот дахь Хятадын Соёлын Төвийн захирал Ли Жь холбогдох мэдээллүүдийг танилцууллаа.

Энэ удаагийн Өвөр Монголын Соёлын Өдрүүдийн хүрээнд нээлт, урлагийн тоглолт, ном хэвлэлийн салбарын харилцаа хамтын ажиллагаа, Хятад киноны өдрүүд, кино телевизийн шилдэг бүтээлүүдийг солилцох, олон нийтэд танилцуулах, уламжлалт анагаах ухааны үнэ төлбөргүй үзлэг, зөвлөгөө зэрэг баялаг агуулгатайгаар 12 үндсэн төрөл, нийт 23 арга хэмжээг зохион байгуулах юм байна.

Ли Жь хэвлэлийн бага хурлын үеэр:

- Бүх арга хэмжээ нь Монгол Улсын нийт ард иргэдэд нээлттэй, үнэ төлбөргүй, олон нийтийн хүртээл болсон үйл ажиллагаа юм. Бид олон талт соёлын солилцоо, харилцааны арга хэмжээгээр дамжуулан хоёр орны ард түмний харилцан ойлголцол, сэтгэл зүрхний ойр дотно байдлыг нэмэгдүүлж, харилцан итгэлцлийг гүнзгийрүүлэн, Хятад, Монголын сайн хөршийн найрсаг харилцааг хөгжүүлэх олон нийтийн суурийг улам бэхжүүлэхийг зорьж байна гэж хэллээ.

Редактор : Ш.ЦОГЗОЛМАА

Эх сурвалж : https://mongol.cri.cn/

Түймэрт нэг иргэн өртөж, 7.9 тэрбум төгрөгийн хохирол учирчээ

zulaa — Fri, 16 Oct 2026 12:09:55 +0800

Ой, хээрийн гал түймрийн дуудлагын 77 хувь буюу 134 нь хээрийн түймэр байна

Хуурайшилтын ид үе үргэлжилж байгаа энэ үед иргэдийн санамсар болгоомжгүй үйлдлээс үүдэж ой, хээрийн түймэр гарах нь нэмэгдэж байна. Тодруулбал, он гарсаар улсын хэмжээнд аравдугаар сарын 11-ний өдрийн байдлаар нийслэлийн хоёр дүүрэг, 12 аймгийн 63 суманд 172 удаагийн ой, хээрийн гал түймэр бүртгэгдсэн гэж Онцгой байдлын газраас мэдээлэв.

Энэ нь өмнөх оны мөн үетэй харьцуулахад 36.2 хувиар буурсан үзүүлэлттэй байгаа ч нийт түймрийн 77 хувь буюу 134 нь хээрийн түймэр байна.

Ой, хээрийн гал түймрийн аюулаас 4950 гэр, 25 өвөлжөө, хашаа саравч, найман автомашиныг авран хамгаалж, гурван айл өрхийн найман иргэн, 3760 орчим малыг нүүлгэн шилжүүлсэн байна. Харин ой, хээрийн гал түймэрт нэг иргэн өртөж нас барж, хоёр иргэн түлэгдэж, 12 гэр, хоёр байшин, зургаан өвөлжөө, 38 хашаа саравч, зургаан автомашин техник, 131 бод, 1012 бог мал өртсөн байна.

Мөн урьдчилсан байдлаар нийт 1.016.908 га талбай өртөж, 7.9 орчим тэрбум төгрөгийн хохирол учирсан байна.

Нийт түймрийн 61 нь Дорнод аймагт, 39 нь Сүхбаатар аймагт, 28 нь Хэнтий аймагт бүртгэгджээ.

Засгийн газрын хуралдаанаар 20 асуудал хэлэлцэж байна

zulaa — Wed, 14 Oct 2026 15:34:49 +0800

Засгийн газар өнөөдөр ээлжит хуралдаанаараа нийт 20 асуудал хэлэлцэж байна. Хуралдаанаар эдийн засаг, хөрөнгө оруулалт, газар тариалан, орон сууцны залилангаас урьдчилан сэргийлэх зэрэг олон нийтийн анхаарал татсан асуудлуудыг хэлэлцэж байгаа аж.

Тодруулбал, “Оюутолгой” төслийн ногдол ашгийг хэрхэн зарцуулах талаар нээлттэй санал асуулга эхлүүлэх, атрын газрыг тариалангийн газарт шилжүүлэх, орон сууцтай холбоотой залилах гэмт хэргээс урьдчилан сэргийлэх арга хэмжээний талаар хэлэлцэж байна.

Мөн эдийн засгийн эрх чөлөө, хөрөнгө оруулалтын асуудал, Зөвшөөрлийн тухай хуульд нэмэлт, өөрчлөлт оруулах тухай хуулийн хэрэгжилтийг хангах үйл ажиллагааны төлөвлөгөө зэрэг асуудлыг хэлэлцэх юм.

Түүнчлэн Монгол Улсын Ерөнхий сайд Н.Учралын Орхон, Сэлэнгэ аймагт ажилласан талаарх мэдээллийг сонсохоор төлөвлөжээ.

Эрт илрүүлэх үзлэг улс орон даяар эхэллээ

zulaa — Fri, 02 Oct 2026 10:03:35 +0800

Цэцэрлэг, ерөнхий боловсролын сургуулийн хүүхдүүдийг хамарсан эрүүл мэндийн урьдчилан сэргийлэх, эрт илрүүлгийн үзлэг өнөөдөр буюу аравдугаар сарын 1-нээс улс орон даяар эхэллээ.

Энэ удаагийн үзлэгт нийт 270,689 хүүхэд хамрагдахаар тооцоолжээ.

Тодруулбал, цэцэрлэгийн дунд бүлгийн гурван настай 53,598 хүүхэд, ерөнхий боловсролын сургуулийн нэгдүгээр ангийн зургаан настай 75,838, зургаадугаар ангийн 11 настай 74,751, аравдугаар ангийн 15 настай 66,502 сурагч эрүүл мэндийн эрт илрүүлэгт хамрагдах аж.

Цаашид эдгээр насны хүүхдүүдийг жил бүр тогтмол эрт илрүүлгийн үзлэгт хамруулахаар төлөвлөж байна. Үзлэгийг сургууль, цэцэрлэгт суурилан зохион байгуулах бөгөөд хүүхдийн нас, хөгжлийн онцлогт тохирсон эрүүл мэндийн цогц үнэлгээ хийх юм. Тухайлбал, хүүхдийн өсөлт, хөгжил, харааны чадал болон харааны эмгэг, зүрхний цахилгаан бичлэгт суурилсан үнэлгээ, нурууны муруйлт, хавтгай тавхай зэргийг шалгана.

Мөн хүүхдийн хөгжлийн хоцрогдол, аутизмын хүрээний эмгэгийн эрсдэлийг илрүүлэх үзлэг, тандалт хийхээс гадна өсвөр үеийнхний сэтгэцийн эрүүл мэндийн эрсдэлийн үнэлгээ хийхээр төлөвлөжээ.

Эрт илрүүлгийн үеэр ямар нэгэн эрүүл мэндийн асуудал илэрсэн тохиолдолд хүүхдийг шаардлагатай тусламж, үйлчилгээтэй холбож, цаашдын эмчилгээ, хяналтыг зохион байгуулах аж.

Эцэг, эх, асран хамгаалагч болон суралцагчийн зөвшөөрөлгүйгээр эрүүл мэндийн үзлэг, шинжилгээ, сэтгэл зүйн зөвлөгөө, сорилд хамруулахгүй байх эрхтэй.

С.Магнайсүрэн: Төрийн хэмнэлтийн тухай хуульд нийцээгүй 21.1 тэрбум төгрөгийн зардлыг бууруулах боломжтой гэж аудит дүгнэсэн

zulaa — Thu, 01 Oct 2026 10:39:19 +0800

Монгол улсын төсөв 2,2 их наяд төгрөгөөр тасарсан. Төвсийн тодотголоо өнөөдрийг хүртэл УИХ-ын ирц нь бүрдэхгүй байгаагаас үүдэж хэлэлцэн баталж чадахгүй суусаар буй. Тэгвэл Ерөнхий аудитор С.Магнайсүрэн дараах байр суурийг илэрхийлэв.

Тэрээр "2027 оны нэгдсэн төсвийн тэнцвэржүүлсэн орлогыг 41.3 их наяд, нийт зарлага ба цэвэр зээлийг 43.6 их наяд төгрөгөөр төлөвлөж, төсвийн алдагдлыг 2.3 их наяд төгрөг буюу ДНБ-ий хоёр хувьтай тэнцэхээр тооцжээ.

Төсвийн төсөл нь Төсвийн тогтвортой байдлын тухай хуульд заасан тусгай шаардлагыг хангаж байгаа ч анхаарах хэд хэдэн эрсдэл байна. Төсвийн орлогын өсөлт уул уурхайн салбар болон төрийн өмчит компаниудын ногдол ашгаас өндөр хамааралтай байгаа нь гадаад зах зээл, түүхий эдийн үнийн хэлбэлзлээс шалтгаалах эрсдэлийг нэмэгдүүлж байна.

Мөн 2027 оны төсвийн төсөлтэй хамт дунд хугацааны төсвийн хүрээний мэдэгдэлд дахин өөрчлөлт оруулахаар санал болгосон нь төсвийн тогтвортой байдал, дунд хугацааны төлөвлөлтийн ач холбогдолд сөргөөр нөлөөлөхөөр байна.

Төсвийн зарлага өмнөх оноос 32.2 хувиар өсөхөөр төлөвлөгдсөн. Төрийн албан хаагчдын цалин, суурь тэтгэврийг нэмэгдүүлэхэд 2.1 их наяд төгрөг тусгасан нь өрхийн орлого, эдийн засгийн дотоод эргэлтийг дэмжих боловч эрэлтээс шалтгаалсан инфляцыг өдөөх эрсдэлтэй.

Мөн зарим төсвийн ерөнхийлөн захирагчийн төсөлд үндэслэл, тооцоо судалгаагаар бүрэн нотлогдоогүй, Төрийн хэмнэлтийн тухай хуульд нийцээгүй, хөтөлбөрийн үр дүнгийн үзүүлэлттэй уялдаагүй нийт 21.1 тэрбум төгрөгийн зардлыг бууруулах боломжтой гэж аудит дүгнэсэн. Хөрөнгө оруулалтын төсөл, арга хэмжээний зардал, үр ашиг, үр дүнгийн тооцоолол бүрэн бодитой бус, нийгэм, эдийн засагт үзүүлэх нөлөөлөл нь тодорхойгүй асуудал байна" гэлээ.

НИТХ-ын төлөөлөгч Б.Эрдэнэсүхийн эхнэрээ байнга зодсон гэх үйлдлийг хэрэгсэхгүй болгож, гэр бүлийн хүчирхийллийн хохиролд 43.5 сая төгрөг төлүүлэхээр шийдвэрлэжээ

zulaa — Thu, 24 Sep 2026 09:39:15 +0800

НИТХ-ын төлөөлөгч Б.Эрдэнэсүхэд холбогдох хэргийг Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд хэлэлцээд дараах шийдвэрийг гаргажээ.

Шүүхийн шийдвэрийн талаар тус шүүхийн шүүгч Л.Баатарын бичсэн тоймыг хүргэж байна.

"Шүүгдэгч Э-д холбогдох хэргийн гэм буруугийн шүүх хуралдааныг 2026 оны есдүгээр сарын 18-ны өдрийн 09:00 цагт товлон, тус өдөр хэлэлцээд ажлын цаг дууссан үндэслэлээр шүүх хуралдааныг 2026 оны есдүгээр сарын 21-ний өдрийн 09:00 цаг хүртэл завсарлуулж, энэ өдөр шүүх хурлыг үргэлжлүүлэн хэлэлцэж, шүүгдэгч Э-г Нийслэлийн прокурорын газрын хяналтын прокуророос яллах дүгнэлт үйлдэж шүүхэд шилжүүлсэн хэргээс “гэр бүлийн хамаарал бүхий харилцаатай хүн болох эхнэр Н-г байнга буюу 2005, 2007, 2008, 2009, 2010, 2011, 2012, 2013, 2016, 2019, 2020 онуудад зодсон” гэх үйлдлийг гэмт хэргийн шинжгүй үндэслэлээр хэрэгсэхгүй болгож,

шүүгдэгч Э-г Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан хүний эрүүл мэндэд хөнгөн хохирол санаатай учруулах гэмт хэргийг хүндрүүлэх нөхцөл байдалтайгаар буюу гэр бүлийн хүчирхийлэл үйлдсэн,

Эрүүгийн хуулийн тусгай ангийн 11.7 дугаар зүйлийн 1 дэх хэсгийн 1.1, 1.2, 2 дахь хэсгийн 2.1-д заасан гэр бүлийн хамаарал бүхий харилцаатай хүнийг байнга зодсон, харгис хэрцгий харьцсан, догшин авирласан, хүүхдийн эсрэг үйлдсэн,

Эрүүгийн хуулийн тусгай ангийн 13.12 дугаар зүйлийн 1 дэх хэсэгт заасан мөрдөн шалгах ажиллагаа явуулах эрхгүй этгээд бусдыг мөрдөн мөшгөсөн гэмт хэргүүдийг үйлдсэн гэм буруутайд тус тус тооцож шийдвэрлэлээ.

Гэмт хэргийн улмаас сэтгэцэд учирсан хор уршгийн зэрэглэл тогтоох шинжээчийн дүгнэлтээр “...хохирогч Н-ын сэтгэцэд тухайн гэмт хэргийн улмаас хүний сэтгэцэд учирсан хор уршгийн дөрөвдүгээр, насанд хүрээгүй хохирогч Н-ийн сэтгэцэд тухайн гэмт хэргийн улмаас хүний сэтгэцэд учирсан хор уршгийн гуравдугаар зэрэглэл тус тус тогтоогджээ.

Монгол Улсын дээд шүүхийн нийт шүүгчийн хуралдааны 2023.07.03-ны өдрийн 25 дугаар тогтоолоор батлагдсан “Хүний сэтгэцэд учирсан хор уршгийг арилгах, нөхөн төлүүлэх төлбөрийн жишиг аргачлал”-д дөрөвдүгээр зэрэглэлийн нөхөн төлбөрийн хэмжээг тогтоохдоо хөдөлмөрийн хөлсний доод хэмжээг 23 дахин нэмэгдүүлснээс 45,99 дахин нэмэгдүүлсэнтэй тэнцэх хүртэл, гуравдугаар зэрэглэлийн нөхөн төлбөрийн хэмжээг тогтоохдоо хөдөлмөрийн хөлсний доод хэмжээг 13 дахин нэмэгдүүлснээс 22,99 дахин нэмэгдүүлсэнтэй тэнцэх хүртэл хэмжээгээр гэж заасан.

Шүүхээс хохирогч Н-д хөдөлмөрийн хөлсний доод хэмжээ болох 792,000 төгрөгийг 35 дахин нэмэгдүүлсэнтэй тэнцэх буюу 27,720,000 төгрөгөөр,

насанд хүрээгүй хохирогч Н-д хөдөлмөрийн хөлсний доод хэмжээ болох 792,000 төгрөгийг 20 дахин нэмэгдүүлсэнтэй тэнцэх буюу 15,840,000 төгрөгөөр сэтгэцэд учирсан хор уршгийн төлбөрийг тогтоож, шүүгдэгчээс гаргуулбал зохих хохирлыг 43,560,000 төгрөгөөр тогтоож хохирогч нарт олгохоор шийдвэрлэв.

Шүүгдэгч, түүний өмгөөлөгч нараас хохирлыг нөхөн төлөх ажлын 5 хоногийн завсарлага авах хүсэлт гаргасныг шүүх хүлээн авлаа.

Эрүүгийн хэрэг хянан шийдвэрлэх тухай хуулийн 34.1 дүгээр зүйлийн 3 дахь хэсэгт “Шүүгдэгчийн үйлдсэн гэмт хэргийн улмаас учирсан хохирлыг нөхөн төлөх талаар гаргасан шүүгдэгч, түүний хууль ёсны төлөөлөгч, өмгөөлөгчийн санал, хүсэлтийг үндэслэн шүүх хуралдааныг завсарлуулж болно” гэж,

5 дахь хэсэгт “Энэ зүйлийн 3 дахь хэсэгт заасан үндэслэлээр шүүх хуралдаан завсарлах тохиолдолд завсарлах хугацаа ажлын 5 өдрөөс хэтэрч болохгүй” гэж тус тус заасныг үндэслэн тус шүүх хуралдааныг 2026 оны есдүгээр сарын 28-ны өдрийн 11:00 цаг хүртэл завсарлуулсан болно" гэжээ.

17 Монгол иргэн БНСУ-д эрэн сурвалжлагдаж байсныг мэдээлжээ

zulaa — Mon, 21 Sep 2026 14:36:51 +0800

Монгол Улсад гэмт хэрэг үйлдээд гадаад улс руу оргон зайлсан, олон улсын хэмжээнд эрэн сурвалжлагдаж байсан нийт 37 этгээдийн байршлыг энэ онд тогтоож, Монгол Улсад авчирсан байна.

Эдгээрээс 16 нь Бүгд Найрамдах Солонгос Улсаас Монгол Улсад шилжүүлэн авчирсан этгээдүүд байна.

Монгол Улсын цагдаагийн байгууллага нь гадаад улс руу оргон зайлсан этгээдүүдийг илрүүлэх, баривчлуулах, хуульд заасан журмын дагуу Монгол Улсад авчрах ажиллагааг Интерполын шугамаар холбогдох байгууллагуудтай хамтран хэрэгжүүлж байгаа аж.

Мөн БНСУ-ын цагдаагийн байгууллагаас 2026 оны наймдугаар сарын 12-ны өдрийн байдлаар гадаад улсад гэмт хэрэг үйлдсэн гэх үндэслэлээр олон улсын хэмжээнд эрэн сурвалжлагдаж буй 110 гадаадын иргэн БНСУ-д оршин сууж байгааг мэдээлсэн бөгөөд тэдний 17 нь Монгол Улсын иргэн болохыг тогтоосон байна. Одоогоор Монгол Улсад авчирсан яллагдагч этгээдүүдтэй холбоотой хэргүүдийн мөрдөн шалгах ажиллагаа үргэлжилж байна.

Цаашид Монгол болон БНСУ-ын Интерполын байгууллагууд эрэн сурвалжлагдаж буй этгээдүүдийн байршлыг тогтоох, мэдээлэл солилцох, баривчлуулах болон Монгол Улсад шилжүүлэн авах ажиллагааг хамтран хэрэгжүүлэх юм.

Улаанбуудайн импорт 133 мянган тоннд хүрлээ

zulaa — Fri, 11 Sep 2026 17:41:39 +0800

Он гарснаас хойш эхний найман сарын байдлаар улаанбуудайн импорт 133 мянган тоннд хүрчээ. Энэ нь өмнөх оны мөн үеэс 13.8 дахин өссөн үзүүлэлт юм.

Дотоодын махны нийлүүлэлт буурч, ургац хураалт төлөвлөснөөс буурсантай холбоотойгоор 2026-2027 онд дотоодын хэрэгцээн зориулан 100 мянган тонн улаанбуудай импортлох шаардлагатай гэж ХХААХҮЯ мэдээлж байв. Одоогийн байдлаар 2027 оны намрын ургац хураалтын урьдчилсан балансаар улаанбуудай, төмсний хэрэгцээг дотоодын үйлдвэрлэлээс бүрэн, хүнсний ногооны хэрэгцээний 67.7%-г хангах боломжтой аж.

Одоо хэлэлцэж буй төсвийн тодотголоор стратегийн хүнсний нөөц бүрдүүлж, хангамжийг тогтворжуулах зорилгоор 150 тэрбум төгрөгийн эх үүсвэрийг тусгаад буй. Энэ хөрөнгөөр 100 мянган тонн улаанбуудай, 12 мянган тонн хүнсний ногоо, 20 мянган тонн мах нөөцлөхөөс гадна зоорь, агуулахын хүчин чадлыг 20 мянган тонноор нэмэгдүүлэхээр төлөвлөж байгаа билээ.

Улаанбаатар дахь учиртай сайхан үзэсгэлэн

zulaa — Mon, 07 Sep 2026 17:02:37 +0800

Дижитал хэлбэрт оруулсан монголын эртний ном судар ба сурвалж бичиг, соёлын бүтээлч бүтээгдэхүүний үзэсгэлэн 2025 оны 12-р сарын 12-ны өдөр Монгол улсын Шинжлэх Ухаан Технологийн Их Сургуулийн Мэдээлэл, Холбооны Технологийн Сургуульд нээгдсэнээс хойш 18-ны Дижитал хэлбэрт оруулсан монголын эртний ном судар ба сурвалж бичиг, соёлын бүтээлч бүтээгдэхүүний үзэсгэлэн 2025 оны 12-р сарын 12-ны өдөр Монгол улсын Шинжлэх Ухаан Технологийн Их Сургуулийн Мэдээлэл, Холбооны Технологийн Сургуульд нээгдэж 18-ны өдрийг хүртэл Монгол Улсын Хөдөө Аж Ахуйн Их Сургууль, Монгол Улсын Үндэсний Их Сургууль, Монгол Улсын Шинжлэх Ухаан Технологийн Их Сургууль, Улаанбаатар хотын Баянгол дүүргийн Эрүүл Мэндийн Төв, Энхтайвны өргөн чөлөөнд байрлах East plaza төв оффис зэрэг их сургуулиуд болон байгууллагуудаар нийт зургаан удаа зохиогдлоо.

Мөн үзэсгэлэнд хиймэл оюун ухаан АI машин орчуулга, Жангар туулиар сэдэвлэсэн цуврал бүтээгдэхүүн, эртний ном судрын систем, Монгол анагаах ухааны платформ зэрэг ауулгын хүрээнд дэлгэн үзүүлж, их сургуулийн багш оюутнууд ба нийгмийн олон салбарын хүмүүсийн анхааралд хүрч, онцгойлон машин орчуулга, код хөрвүүлэх , үсгийн залруулга, цахим толь бичиг, уламжлалт монгол үсэг ба кирилл үсгийг хөрвүүлэх зэрэг технологи нь оюутнуудын анхаарлыг татаж, өөрийн хичээл суралцлагад зориулан тухайн талбайд туршин хэрэглэсэн юм.Тус арга хэмжээг Хятадын ӨМӨЗО-ны “Өвөр Монголын Өдрийн Сонин”-оос голчлон зохион байгуулж, Өвөр Монголын “Оюун” Мэдээлэл Технологи үйлчилгээний ХХК дэмжин ажилласан байна.

Зохиогч: ЮЙ-ИН,ХАНЬ ХУНШЯ, Хай Лиянь, Үйлс, Фү Гэнь

Найруулагч: ХаньХуншя

Эх сурвалж : Солонго